أفضل قصائد الشعر الليبي الشعبي: تحفة فنية في تصنيف الآداب

قصيدة: الصبر

قال الشاعر عبد الونيس المسماري:

اصبر على المقسوم صبرك طيّب

الصبر ما عمره رجاك إيخيب 

اصبر على الصاحيب

حتى بعد يغلط عليك إيخيب 

لا تعاتبه لا تتركه وأتغيب

الصاحب الخيرة راه ما يسيّب 

هذا زمان الود فيه صعيب

والقَدر ناقص والرفيق أعطيب

والناس تمّت في الكبير أتعيب

ويهزوا على الشايب أبقول أشويب

أصبر على جيرانك

وديما أمعاهم عدّله ميزانك

وحتى أن عابوا نين وصلت ذانك

أكمي السر وما عليه أتغيب 

واللّي جفا زوّد عليه أحسانك

تلقى العدو منهم عليك أحبيب

الجار مهما جار صون لسانك

ما دام وصّانا عليه الطيب 

أصبر على شيّابك

وأطلب أرضاهم قبل يوم أحسابك

هم جنـّتك والاّ أسباب عذابك

يوم القيامة يفتحوا الكتيب

وجميع ما درته حواه أكتابك

والنار والجنة أحذاك أقريّب 

لا واسطة لا فيه من يشقابك

إلا الصالح م العمل والطيّب

اصبر على ذرّيتك

ودايما مع مولاك صفِّي نيتك 

وأرضى بمو مكتوب في قسميتك

لا أتحير لا تاكل اللّي مو طيب 

وبالغضب ما تقدر أتحل قضيتك

وبالصبر تفتح كل باب أصعيب

ومهما جرالك ما أتبيع هويتك

وقوّة إيمانك دوم فيك أتهيب 

أصبر أن حالك ضاق

وأرفع إيديك وقول يا رزاق

وحتى المعيشة كان ما تنطاق

راه الفرَج عند الكريم أقريب 

وأن كان مسكنك بالهون في حلاّق

ومالك سند يحميك دوم أمريب

أذكّر أيام البيت فيه أطقاق

ونار الحطَب حلو الطعام اتطيب

وفرحنا نحيوه بالصفاق

لا فيه فرقة لا فساد إيشيب 

قصيدة: ليتني دم بوريدك

ليتني دم بوريدك أدخل القلب وأشوف

هل أنا ساكن بوسطه أو أحد غيري لفاه

ليتني حبر بيدينك أقلب أفكارك حروف

أكتب اللي قد كتمته وما تبي غيرك يراه

ليتني ظل بنهارك ليتني بليلك طيوف

أسهر الليل بخيالك وأسمعك لا قلت آه

ليتني كلك وكلك.. ليتك بحالي تشوف

غيرة العاشق مصيبة والمصيبة في هـواه

قصيدة: يا العين توبي عالقديم وخلك معاي

يا العين توبي عالقديم وخلك معاي واتبعيني عالجديد أندلك

غزير اهدوبـه توبي عليه وعن جراير صوبه

وين عورجت في النص بيك ادروبه عديه في عدد م الوقت ما حاصلك

وخليه في ضلالاته اذنوبه دوبه وأنت بأجر تجازي ويسجلك

بالك مع رأيي اتجينا توبه على صوب سيوره ان طال يهلك

عالقديم وناره وعلى عمر عدًا في رجاه اخساره

مرهون حر في رايه وفاللي داره ونا حر فيك ما انريد انضًلك

سحبتي معاه خذاك في تياره يضمك امعاه وفي خفاء يفتلك

قصيدة: يا ما صار

يا ما صـار

ويا ما حكينا لبعضنا الأسرار

عشرة سنين أطوال موش نهار

بذلتها بفراق من عاشرت

عمرك معايا قبل ما تحتار

واليوم ما نعرفش كيف أختـرت

عاش الغلاء بيناتنا بأقدار

ومات الغلاء عندك وما خبـرت

كميته أسرار وبحت بيه جهار

أمنت وأنت الحب بيه كفـرت

يا ميـم عيني يا زهاء الأنظار

مشتاقلك وأنت علي صبرت

وما عاد جتني من قداك أخبار

وماكش بعيد الدار لا سـافرت

عشقتك عزفتك لحـــن عل لوتار

إحساس بيك ع الناس بيه شعرت

تمنّيتك معايا في أول المشـوار

لا اخترت غيري لا ســواك اخترت

تحديت بيك النار والتيار

قصيدة: عالصدق

عالصدق عشنا

والوفا شيمتنا

ومهما ابتعدنا غالية عشرتنا

اللي ايعزنا انعزوه

اللي ايودنا بكل الوفا انودوه

ما يوم عمرك تندم علي رفقتنا

قصيدة: الدنيا طويلة

الدنيا طويلة والزمان ايكافي

واللي عطاك إجمام

رده وافي واللي جاك صافي

النية وفي القلب ما يحملش

ذرة سيه اصدق امعاه

وكون مية مية

كيف ما صفالك عامله بالصافي

وفي من رسملك بالسراب

أميه وكاتم أسراره

في الكنين وخافي

إتجي لذغته من تحت كيف الحيه

وأنت في ضنك شخص قلبه وافي