أبرز قصائد الشاعر سعد بن جدلان: تحفة أدبية تاريخية

قصيدة: فاعل خير

أنا وين أبلقى يالاجاويد فاعـل خيـر

حريصٍ على سرّ المحبيـن لا رسلتـه

أناّ لوّ أبصبر عام ما بـان بـي تأثيـر

وهالحين حتّى الصبر يومين ما أحتلتـه

أنا مثل صقـارٍ تولّـع بحـبّ الطيـر

ولف قلبه فـروخ الصورايـم وهبلتـه

تولعّت في فرخٍ قضيـبٍ يتـلّ السيـر

أبي نظرةٍ من لفتـة الحـرّ وسبلتـه

صغيرٍ بسنّه غير عندي ما هو بصغيـر

يا مغلاه فـي قلبـي ويا كبـر منزلتـه

أجمعله سمان الهرج خوفٍ من التقصير

والى جيت ابشرح له كلامي تهيزلتـه

يجيني منّه هيبة معزه سحى تقدير

اقابلـه عنـدي علـم وأروح ما قلته

قصيدة: ودنا بالطيب

ودّنا بالطيب بس الدهر جحّاد طيب

كل ما تخلص مع الناس كنك تغشهـا

يدك لامدت وفا لاتحرى وش تجيب

كان جاتك سالمه حب يدك وخشهـا

كل ماشـبـيت نار المحبة مع حبيب

قام يسحب فـي مشاهيبهـا ويرشهـا

كل ما واجهت لك في الزمن وجه غريب

مثل ما قـــال المثل دام تمشي مشها

وذمةٍ ماهيب تندان للحق المصيب

جعل قشاش الحطب لاسَرح يقتشهـا

قصيدة: القناص

ياعنـــا القنـــاص يالصيد المّدسم

يا كتاب الشمس وكتــاب الطلاسم

أمسك أعصابي وإذا شفتك تّبسم

كنك تكويني على الكبد بمياسم

كن بيــاضك مـن حــمارك لاتقّسم

عارض في وجنتك موكب مراسـم

قصيدة: زاومني الهاجوس

زاومنـي الهاجـوس ملعـون أبـو الأهـل

يقـول البـيـوت العـصـم وإياك وإياها

لا عيّنت كلمة قلت يضـرب بهـا المثـل

لقـيـنـا وراهــا كـلـمة كـّنـهــا إيــاهــا

ما تنجح مدارس فلسفـة علـم فـي جهل

والعربان ما كلٍ يقـدر يكسـب رضاهـا

يحاول قـدر الإمكـان يعنـي علـى الأقـل

يدخل في مفاهيم العرب يكسب اصغاها

قصيدة: يا زمن المشي في الروض الخضر

يا زين المشي في الروض الخضر لا شعشع المخضار

يازين الديرة اللي من حقوق الوسم ممطورة

يريح البال سجٍ في الفياض الخضر والمسيار

سعادة للقلوب اللي من السلوان مســــرورة

متى عيني تشوف اللي على قلبي ربيع ودار

أشاهد للسعادة في حياة المجتمع صـــــورة

لا هلت مزون فوقهن تنعومتين صغار

على ذيك اللباب اللي من الرضوان مغمورة

لا منه أصحى سماغر المزون وشعشع النوار

ودجاه أدلى سدوله والقمر متجلي نــــــوره

أشاهد لي بروق دونها ربانها تندار

تقول أكباس غاز من ورا شلال نافورة

سبح ماهر خيالي في الخباري والبرد والنار

وأشوف الجمر فوقه دلة الرسلان منحورة

هذاك المنظر اللي ما تشوفه في الحياة أمرار

على شوفه سبابيح الخيال تموت مقهورة

حرام إني ما أهني راع المليون والمليار

ولا أهني عربسات الفضا دوره ومقدوره

أعيش بعالم طول المدا يبقى لها تذكار

عليّه بالحرام إنها حياةٍ مالها جوره

هذا وجه الصحيح ولا على وجه الصحيح غبار

حقيقة ويتمعنها اللبيب بكامل شعوره

قصيدة: ألا يا الله باللي تحت هيبة سلطنتك أسلمت

ألا يا الله ياللي تحـت هيبـة سلطنتـك أسلمت

لك المسلم يسبح لك بحمـدك ولـك الإسلامي

احمدك وأشكرك وأثني عليك بما علـي أنعمت

تزودني وفا قـدر العشيـر ووصـل الأرحامـي

ولجك الفجر يا ليل الذهول اللـي علـي أظلمت

يعرضك واقع الماضي بعيني عـرض الأفلامي

ولهتك يالنديم اللي على صافي وفـاك أضرمت

بصفحة ذكريات العام واللي مـن ورا العامـي

بعد تقرير مشوار التجـارب نجحـك واجزمـت

بان السيف سيفي والعصـا والمحـزم احزامـي

عطتني عزلة إخلاصي معك نسيان مـن نادمـت

كتبتك وانطوت صحفي عليـك ورفعـت أقلامي

أباهي لا ابالـي واتبيسـط كــل ما قدمت

اشـب النـار قـدام العـرب وأشيد اخيامـي

نهاري حر شمسه يستحي منها لسـان الشمـت

وليلي ترقب نجومـه ملامـة كـل مـن لامـي

على ضو الكلام اللي كشف عنا ستـار الصمـت

عرفت أني تحت برق الأمل في روض الاحلامي

أحسب إنك تيمم با اتجاهـي ويـن مـا يممـت

وأثر ما أنت بورايه في الطريق ولانـت قدامـي

مصيبة لا تدنت قيمتك فـي عيـن مـن قيمـت

يشوفك بالسهل وانته تشوفـه بالسمـا السامـي

كثر ما حن قلبي للونيـس وكثـر مـا درهمـت

فجر صدري حنينـي واتعـب الأقدام درهامـي

عيون الصد وعيون التجافي حول مهما أكرمت

تشـوف المجتهـد كسـلان والبنـاي هدامـي

مدام إن جانبك شام لجنابي وانت عنـي شمـت

كتر خيـرك وانـا مانيـب لاجايـع ولاضامـي

أشوف أنه علي واجـب ليـا مريتكـم سلمـت

مرور إكرام تربطـه الكرامة عنـد الإكرامي

على شان الخفوق اللي على عرشه قعدت وقمت

حجب عنك الدجى لين أشرقت لك بيض الأيامي

مصير الوقت يشرح لك دروسه وإن غفلت ونمت

يصحيك الزمان اللي يصحـي كـل مـن نامـي

تذكرني لا منها خابـت أوهامك فمـن وهمـت

وشفت الفرق في حب الخشوم وحـب الاقدامـي

ختام السالفة يا طيب العشرة كرمـت ودمـت

هذا حقك علي وحق شرهاتـي علـى أوهامي